1 Macc 10

b10.301 Mag 11.34

Alegesanda Ebipanesehanda Yonadana loma binigo mo miaga agali haguane dabo helenego ogo

1 Mali handari mbira pira waragaria (160) layagola Kini Andiogusu igini Alegesanda Ebipanesehanda Tolemese tano ibalu tano ibu karulo hene. Wali agali ogoniha hearume ibu ibiyago mo turu hayagola ibugua tanoha gabumane biabe bulene wiago handaya ho hai hene. 2 Ai Kini Demidiriasa ibugua mbirale biyadagonaga te layago hale howa ibugua Alegesandala wai bule ami agali dewaore ho manda bu hene. 3 Ani manda bu howa Demidiriasa ibugua Yonadana mo gede holenaga bi bayaleru gilibu pelole manda bini. 4 Ibunaga miniha hangu mitangi bialu, Yudasa ibu Alegesandala gi tigani lalu ibula ala nenege howa libu mo gimbu bialu i̱ boligo i̱na Yudasala ala nenege halu gi tigani loliya, lo manda bini. 5 Ainde mana ko iname Yonadana halu ibu hamenerubi ibu dameneruhondobi birimago manda bu holebira, lo manda bini. 6 Ani manda buwa ainde harugo lowa Demidiriasahanda Yonadanahondo lawia halu ibugua lalu, Ami agali manda manda bu halu danda timubi wai pole yaga damene manda manda bu yu habe, lowa lalu, Yonadana iyaore mandagi haabo habiya, lalu lo pelene. Ani bialu Yuda agali maru Yarusaleme wai pabeanda hongohe biagoha garabaya hayaru golope halu Yonadana karia daibia lalimu lalu lo wia hene. 7 Yonadana ibugua beba ogoni yalu Yarusaleme ibuwa wali agali bu hearu denibi ami agali Yarusalemeha wai pabeanda hongohe heagoha mamage haga hearunaga denibi dagala tagi hene. 8 Ai kini ibugua Yonadana hongo mialu ami agali tidi mbira haru habe layayago hale howa ti mogolo hendene. 9 Agali wai pabeanda hongohe handaya ho haga biaru tigua bi uruni hale howa garabaya agali anda ogoniha helene biaru golope halu Yonadana hearia dai bidaba layagola ti aba ai̱ya hearia andaga piai hene.

10 Ani bialu Yonadana ibu Yarusalemeni howa tano mo ko ho wiaru arema bialu mo tiga bialu hene. 11 Ibugua agali biabe biaga hearuhondo lamialu, Ege to̱le̱ bayale tigabi ngaru mo yuwa tanonaga wai pabe baya hangu biatiga bialu Saiono nene ngago ege pabe hongohe bu mabu bulene nga, lalu lamini. Ani layagola tigua bilimu layadagua biai hene. 12 Ani biya handala agali maru dindi tara howa ibini Yarusalemeha wai pabeanda hongohe Bagidesehanda bu helene biagoha heneru ibida piai hene. 13 Ti bibahende Yarusaleme wahalu tini dalu pugu pugu bini. 14 Agali maru bi mana lo wini ngaru mo wahaga heneru ti Bedesu tanoha haabo hene. Tinaga hado anda tano ogoni wini.

15 Ai Kini Alegesanda ibu Demidiriasahanda Yonadanahondo ogoale bibiya lalu bi gili bu wia hayayago hale hene. Ani bialu Yonadana halu ibu hamenerume wai timbuni bialu henegobi biabe timbuni tigua bini wiarubi genda tara tara tigua yu henegobi bibahendenaga te ogoale bira lalu marume lo yalu ibiyago hale ho hene. 16 Ani hale ho howa ibuni hangu lo manda bialu lalu, Agali hongohe Yonadana ale mende nahe. Ibu inanaga nenegeore howa ina heba holene karulapeda, lene. 17 Ani manda buwa ibugua beba Yonadana hearia gilibu pelalu howa lalu, 18 Kini Alegesandahanda ibu hamene Yonadana bayale kebe lara. 19 Iname hale harimago í̠ agali wai biaga hongohe pari wayaliore ke layago. Ainde inanaga nenege hami̱ya hamelo kema. 20 Ani howa ayu í̠ í̠naga wali agalinaga Anduane Homogonaga loma binigo mo miaga agali habelo dabo helarama. Ani bialu í̠naga mini Kininaga Nenege larama. Í̠na baba mandagi haga inanaga nenegeore habe, lene. Ani lalu Kini Alegesanda ibugua kininaga aga daramabi mbira kininaga manda ngolome wabini mbirala Yonadana karulelo mo yalu poa helo mo wia hene. 21 Ai Horo timbuniAnda Nemandaruha Palu Holene Horo ege kaneni Yonadana ibugua Anduane Homogonaga loma binigo mo miaga agali haguanenaga aga karulagane ale mo karulene. ^{▼▼(10.21)Yuda wali agali tinaga ege kane ogoni inanaga ege dini pinila (Sebedemba - Ogodoba) hengeneha haga.Ani bialu ibugua ami agali dewaore mo mogo bu helowa ami agalinaga wai biagane ale dewaore ti yilo mo ta hene.Yonadana ibugua Alegesanda Ebipanese biamogo binigo ogoni.}

Yonadanahanda Alegesanda Ebipanese biamogo binigo ogo

22 Ai Yonadana ibu Anduane Homogonaga loma binigo mo miaga agali haguane ka layago Kini Demidiriasa ibu hale howa ibunaga miniha tandaga timbuni howa ibugua lalu, 23 Alegesanda ibu ala nenege helo harimadago agidabe. Ibu ala puwa Yuda baba nenege halu mandagi hayada. 24 Ai inabi nde bi dendebiore lo pelalu ibula nenege halu ibuha ina biamogo bulene maru yamuliya. Ani bialu ti mo turu halu mbirale bayale duniniore ngago mo wia holiya, lene.

25 Ani lowa ibugua bi ogodagua gilibu wia hene. Kini Demidiriasa ibugua Yudia dindiha wali agali kemiruhondo horombe lalu bayale kemibe, lalu bi lo wia hara. 26 Ainde tígua ina baba bi pongo wirimago mo habo nale baya hangu yu haabo halubi ina baba nenego haabo halubi inanaga waitigi karu baba mandagi howa nenege nahebi kemigonaga ina turu ho kema. 27 Tígua ina baba nenege bayale haabo harimiyagua nde iname tíhondo bayale bulene ngago bialu haabo holeberema. 28 Iname tínaga dagisi ngiaga wirimigo mo wahalu tí mo turu halu mbirale bayale ngaru bame nguleberema. 29 Ayu ina Yuda tíhondo bi ogodagua laro. Ai tí dagisi maru wiaga wiyago ibi yolonaga dagisibi kininaga dagisi miaga wiyagobi mo wahai haro. 30 Tígua widi linibi ira lini nagane dedarubi halu tebonego ina ngiaga wirimigo ai ayu howa mani lone nangilimu. Ayu ogoni howa maniorebi ina Yudiaha howabi dindi tebira Samarianaga winibi Galilinaga winibi Yudiaha bo tago hene ngagoha howa dagisi ngi nalole ayu waharogoni. ^b 31 Ina Yarusaleme ngagobi dindi emene maru kaware ngarubi bibahende loma biahe wiabagi hene nga lalu uruniha howa dagisi tara tara mulene nawiore lalu latagiho ngelaro. 32 Ai Yarusalemeha wai pabeanda hongohe hayago ina handaya ho haga wirugo yupe halu agali Anduane Homogonaga loma binigo mo miaga agali haguane timbuni kago ibu giha ya harogo. Ibunime ami agali maru dabalu anda ogoni mamage helo dabalu helolebira. 33 I̱naga dindi ngogoha Yudanaga ami agali garabaya kago bibahende ayu ogoningi dege golope halu pudaba lolebero. Tígua yolobia dai bilimulo ndo bame golope holebero. Ani bialu agali uruninaga nogo bulumaga sibi hinu kagonagabi dabudabu tara tara ngagonagabi dagisi ngi nalolebero. 34 Ai Sabada horobi ege gahenge ngabulo kagonaga horo timbuni lotu laga ngago tagira ibirangibi horo lotu lagane timbuni maru ngago tagira ibirangibi wali agali tara tara karume Yuda wali agalihondo dagisi ngi nalole. Ani bialu horo timbuni lotu laga uruni mani ibilo horo tebirani dagisi nabi halu hai howa horo tebira degeni dagisi mulene nawiore, laro. 35 Horo ogoningi mendealime í̠ kegoha ya lo hale holenebi tíha mo genda holenebi nawiore laro. 36 Yuda ami agali daosini pira tebira (30,000) kininaga ami agali baba hatago holene nga. Ani bialu tinaga yolo kininaga ami karu miradagua dege mulebira. 37 Maru ti kininaga pabe anda hongohe ngagoha halu marume gabumane biabe bulebira. Ani howa tinaga mamali mana bialu haga winidago abale kini ibuni bialu helo layadagua bialu holebira. 38 Dindi hobane tebira Samaria dindinaga winigo Yudia dindihayagi yamialu mo tago hayago Yudia dindiha wiaabo helo. Ani bialu bibahende gabumane mbiraore hangume handa gimbu buwa Anduane Homogonaga loma binigo mo miaga agali haguane timbuni kagonaga giha habelo. 39 Ani bialu muni maru Tolemese tanoha howa mo wigi bini ngogo tigua Yarusalemeni anda loma bia hene kagoha biabe bulene ngaru bilimulo ti mo turu halu bame ngulebero. 40 Ani bialu kininaga muni andaha muni ngago aria siliba muni daosini nguira (15,000) biabe tara bulene ngaru bilimulo ngulebero. 41 Mali maru piyagoha muni maru gabumaneme anda loma bia hene Yarusaleme hayaha biabe bulenego mope howa bame ngelo hayago ogonibi ayu yupe halu tini mo ngulebero. Ai ayu ogoni howa maninaga tinaga yolo tigabi mialu holeberemi. 42 Ani bialu lotu biabenaga dagisi siliba muni daosini duria (5,000) miruligo waharogoni. Muni ogoni ibu agali loma binigo mo miaga Anduane Homogonaga andaha biabe biaga karu yolo bilo ngelo waharogoni. 43 Agali mbira dindi i̱na handaya ho howa haru kogoha karu aria mbirame kinila dano ho howayagua maru baba dano ho howayaguabi ibu dano hangabe nahedagola ohalu puwa Anduane Homogonaga andaha ha do heyagua nde agali ogoni ibu garabaya napolebira. Ani bialu ibunaga mbirale ngago mo yulenebi nawi. 44 Ai anda biago kagonaga wai pabe biatiga bulenebi anda biatiga bulenebi uruni bulenenaga muni kini ibuniha howa ibulebira. 45 Ani bialu agali maru Yarusaleme wai pabe bu mabu biragonaga yolobi Yudia dindiha tano pabe biragonaga yolobi kini ibunime bulebira, lalu Kini Demidiriasahanda lene.

Yonadanahanda Demidiriasa erembira minigo ogo

46 Ai Yonadana halu ibunaga wali agali hearume Kini Demidiriasahanda bi layago mo henene nahe hene. Irane ala Kini Demidiriasa ibugua tihondo mana ko bini dewa wialu genda timbuniore tiha mo ya hene wiagome nakarulape wini. 47 Ai tigua Kini Alegesandala dege habo nalolene bi lo wiyago yu howa gi tigani layago manda bu holene manda bini. Ani bialu habo nalolene bi ogoni pugua nabi haabo halu homalu wahabiya layago manda bu hene.

48 Ai Kini Alegesanda ibugua ami agali dewaore haru halu puwa Kini Demidiriasa deni balai anda bini. 49 Kini kirali biago wai bule ngola ho hebigola Demidiriasanaga ami agali hearu ibida piai hene. Ani biyagola Kini Alegesanda ibugua talima pugu pugu bialu bo wahai halu wayali hene. 50 Ani bialu wai hongo howa bialu bu alendo halu Kini Demidiriasabi waiha homalu bini.

Alegesanda ibu wali Keleobadara dabu binigo ogo

51 Mani howa Alegesanda ibugua Iyibi Kini Tolemi hearia bi lama pudaba lowa lawia halu lalu, 52 Ai i̱ninaga dindini daibu howa ayu i̱ mamalirunaga kini biragane dagia ngagoria bedo. I̱naga gabumane biabe mo tiga biai howa ayu dindi bibahende handameho ko. 53 Ayu dege i̱na Demidiriasanaga hongo bo podalu ibunaga dindibi i̱na dege handame ho kogoni. 54 Ayu í̠la habo nalolene bi lo wibiya hame ledo. Í̠ wane i̱ daubuliya í̠na karulape labelo hame ledo. Ani beregola i̱na wariabu libu harume tabaga nahalibulo karulapeore bulebero, lalu lo pelene.

55 Kini Tolemi ibugua ladai bialu lalu, Ainde í̠ lone dai bialu í̠naga mamalirunaga dagia wiagoria í̠ni kini ti henegoria haaribia halu í̠ni birariyangi ina wali agali bibahendeme turu timbuni harima. 56 Í̠na bi lariyago i̱na hale howa i̱ wane bedago í̠ dau bibelo karulape laro. Anigo ainde i̱na í̠ baya hangu hondo manda bialu í̠nabi nde i̱ baya hangu hondo manda bibelo Tolemese tanoni ngola habiya, lene.

57 Ani lalu Kini Tolemi halu ibu wane Keleobadarabi Iyibi wahalu Tolemese tano ibini. 58 Ani ibiyagola Kini Alegesanda ibu ibalu ti Tolemeseni ngola howa Kini Tolemihanda ibu wane Keleobadara Alegesanda dabu bilo mini. Ani miyagola libu Tolemese tanoni yári baya tara tara kinime hamelaga wiaru karulowa ogoriani mo dabubia hene.

Alegesanda ibugua Yonadana ami agali haru haga haguane helo helenego ogo

59 Alegesanda ibugua beba mbira gilibu wia halu Yonadana ibu ngola hole ibabe lalu lawia hene. 60 Ani layago hale halu Yonadana ibu yári bayaleru mo karulalu kini kirali biago labo Tolemese tanoni berebiria ngola hole pene. Puwa ibugua libu mo turu halu siliba ngolobi dewaore mini. Ani bialu libunaga ami agali haguane hearubi mo turu halu mbirale mia dege bini. Ani biyagola wali agali bu hearume Yonadana mo turu halu bi laga bini. 61 Anigo horo ogoningi dege Isaraele agali ko maru heneyago tigua Yonadana mo ko holenaga bi marubi lalu hene. Ani layago Kini Alegesanda ibu hale nahene. 62 Kini ibugua lalu, Kininaga aga daramabi ngago Yonadana ibu karulelo mini. 63 Ani bialu kini ibugua Yonadana ibunaga gi tigahayagi berelalu buwa ibunaga agali haguane bu hearuhondo lamialu lalu,Yonadana haru halu tano hanuni pupe hole pudaba. Ani bialu tígua wali agali bu karu lamialu tí Yonadanahanda ko biya lalu ke̱ howa bi mbira laremigo hale naholeore. Ani bialu mbiralime ibu mo genda naholeore, lene. 64 Ai agali marume ke̱ howa Yonadana ko biya lalu bi bame laede haga hearu tigua handalu hemiria kinime Yonadananaga mini mo yaraga hayayago de hondowabi kininaga aga daramabi wiago mo karula heago hondowabi ti gi halu ibida pene. 65 Anigo kini ibugua Yonadana mini timbuni mini lene helene. Ani bialu ibu mini Kininaga Nenege helalu ami agali haru haga agali haguane dabo helalu ibu daluha agali haguane ho bamba hene helo dabo helene. 66 Turu holene timbuni Yonadanaha to̱latagi halu ibu hendore mo palia holene karulo biralu nde Yarusaleme dai bini.

Yonadana ibugua Aboloniusu bope henego ogo

67 Mali handari mbira pira waragariani duria (165) hayagola Kini Demidiriasa mende ibu Demidiriasa mbira igini henego ibugua Kiridi dindi iba dege dombeneha wiago wahalu dai buwa ibuni dalu bamba ibu mamaliru berene wiagoria hole pene. 68 Ai Kini Alegesanda ibu Demidiriasa lone daibu ka layago hale howa ibunaga miniha genda timbuni halu ibu Siria dindinaga tano dunini Andiogo dai bini. 69 Demidiriasa ibugua Aboloniusu heago gabumane haru haga haguane Koelesiria wiagoria helo dabo helene. Ani heleagola ai Aboloniusu ibugua ami agali mo hongo ho helowa haru halu puwa Yabane tano kawareni balai anda bu hene. Ani buwa ibugua Yonadana hearia bi lowia halu lalu, 70 Í̠ hangume i̱la wai bialu howa wali agali bu karunaga deni í̠na i̱ lo guralu kego aginaga bialu kebe. 71 Ainde í̠naga ami agali kago para howa uruniha hongo hanaho howa lariyagua nde hari bareha kego wahalu dindi tigabi ngagoria howa hongo manda bialu wai bibiya daliape halu ibabe. Anigo manda ala bia handa. Tanoha ami agali hayadaru ti i̱ baba hatagoho kema ndobe. 72 Ai í̠na i̱ ai henedabe handalu i̱ heba ai dege henedabe hondole hondo habe. Í̠na i̱la bulene hongo nakarulapeore kegoni ndobe. Bamba í̠ aba mamaru tigua i̱la hongo manda bialu hearia nakarulapeoreya handala halu kira libu dindinaga wai hongo howa bia nabi ibida piyago í̠ manda bide. 73 Í̠na i̱ aguaore bope holene manda bidebe. I̱naga ami agali í̠na bamibe nahe gibiore maru nogo hosini biruwa wai bulenebi ami agali damenebi dewaore haru kogo ainde dindi tigabi ngagoria wai bibiya tagira ibalu keria í̠ erembira mulene ege to̱le̱ hibaria mbira nawulebira ndobe. Ani bialu í̠ ibida polene diri mbira nawioreni porabupe holebere, lene.

74 Aboloniusu ibugua bi ogoni layayago Yonadana hale howa ibu keba timbuni hene. Ani howa ibugua ami agali pari wayaliru daosini pira (10,000) haru halu Yarusaleme wahalu tagira pene. Ani biyagola ibu hamene Saimono ibuguabi ami agali haru halu íbu dege bini. Pialu agali halu kira piyago bibahende Yoba tano wiago be tagiraha balai anda bini. 75 Ani bialu heagola wali agali tanoha hearume tanoha pabe panga payatagi hene. Anidagua binidagoni irane Aboloniusunaga ami agali maru tanoha heagola bini. 76 Ani biyago bilowa Yonadana ibugua wai Yoba tanoha giala anda halu wai bini. Ani biyagola agali tanoha hearu tigua gi howa tanoha panga dugupe hayagola tano ogoni Yonadana ibu mo wini. 77 Aboloniusu ibu hale hayaria Yoba tano Yonadana ibu mo wiya layago hale howa ibunaga ami agali nogo hosini biruwa wai biaga daosini tebirabi (3,000) ami agali dewaorebi heba tidi yalu ohowa Asadodo ibida pole petingi halu pene. Ibunaga ami agali nogo hosini biruwa wai biaga hearume wai bilonaga dindi tigabi bayale wiagoria henge ngelonaga ibu emene dogolo mialu amura pene. 78 Yonadana ibugua Asadodo talima pialu ogoriani howa wai bini. 79 Anigo Aboloniusu ibunaga ami agali daosini mbira (1,000) nogo hosini biruwa wai biaga Yonadana erembiraha yagi wai tibini waraanda ho bereleago Yonadana nahende wai dombeni pora bini. 80 Mani howa Aboloniusunaga wai hanalu birayayago Yonadanahanda handa walia hene. Tigua Yonadananaga ami agali wara dombe bia howa timu tombe mbiraha doba bayago ti heagoria ibai hene. Wai egerebahagi howa binigo bialu alendo hene. 81 Anigo Yonadananaga ami agali biarume ibunaga bi hale halu hongo ho hai hene. Ani heagola waitiginaga nogo hosi biaru manga hai halu tinaga hongo pirilope hai hene. 82 Ani biyagola Saimono halu ibunaga ami agali biaru anda ibini. Ibalu wai abale pora buwa Aboloniusunaga ami biaru ba dege bialu bo hengeda hai hene. Ani biyagola waitigi biaru ibida pugu bialu piai hene. 83 Agali nogo hosini biruwa wai biaga biaru wai hama wiagoria pu luluya hama ibaga bialu hene. Ani bialu ti ibida pialu Asadodo tanoha mbirale dama mitangi bialu bi pupu wiaga gime wabini mini Dagononaga anda timbuni heagoha birado hai hene. 84 Ani biyagola Yonadanahanda Asadodo tano bibahende bo heda hai halu tano emene maru wiarubi heba bo heda hai hene. Ani bialu tano dabudabu tara tara wiaru mo yai halu bini. Ani bialu Dagononaga anda timbuni heago bo heda halu ami agali wai ibida pialu anda ogoniha birado hayago heba bo heda anda halu bini. 85 Waitigi waiha howa ayu tibume dibini homayagobi andaha waranda howa hedaanda hene homayagobi bibahende daosini halira (8,000) homene. 86 Mani Yonadana ibugua Asadodo tano wahalu puwa Asagelono tanoni balai anda bini. Agali tanoha haga hearu ibu ngola hole harigani tagira ibini. Ani ibuwa tigua ibunaga mini mo yaraga hai hene. 87 Ani bialu mani Yonadana halu ibunaga ami agali biaru tigua tinaga waitigi bo wahayarunaga mbirale bayale wiaru mo hilo yalu Yarusaleme dai bini.

88 Yonadanahanda wai hongohe biya layago Kini Alegesanda ibu hale howa ibugua Yonadananaga mini yaraga hene. 89 Ani bialu ibugua manda ngolome wabini mbira Yonadananaga wia hene. Yari ogoniale kini ibuni damene darama mbiraore kago miaga winigo Yonadana mini. Ani bialu Egerono tanobi dindi emene ogoniha wiarubi bibahende Yonadana ibuninaga tanoore ogoni wilo kini ibugua Yonadana mini.